Энергетика және ТКШ салаларының тауар өндірушілеріне арналған каталог әзірленіп жатыр

Бұл туралы «Тұрғын үй-коммуналдық шаруашылығын жаңғырту мен дамытудың қазақстандық орталығы» АҚ басқарма төрағасы Нұрлан Солтамбеков хабарлады.

Отандық тауар өндірушілердің өнімдерін қолдану – бұл «Энергетикалық және коммуналдық секторларды жаңғырту» ұлттық жобасының негізгі шарттарының бірі. ЭКСЖ-ның техникалық операторы ретінде ҚазТКШ орталығы отандық өнімнің ел ішіндегі үлесін арттыру және шетелдік қосалқы бөлшектерге тәуелділікті азайту бағытында өндірушілерге қолдау көрсету шараларын қолға алып отыр.

«Біз жұмыс барысында өндіруші кәсіпорындардың нысандарына барып жүрміз. Қазіргі таңда 50-ден астам зауыт біздің көшпелі топтармен қамтылды. Кәсіпорындарға барғанда мамандарымыз өндірілетін өнім түрлерімен, сондай-ақ жабдықталу деңгейімен, зертханаларымен және енгізілген сапа бақылау жүйелерімен танысады. Кәсіпорындардағы кездесулер нәтижесінде байқағанымыз – кейбір өндіріс орындарында жобалау және конструкторлық бөлімдер жұмыс істейді. Сонымен қатар оқу сыныптары, аккредиттелген зертханалар және ішкі сапа бақылау қызметі құрылған», - деді Нұрлан Солтамбеков.

Оның айтуынша, өндіріс процесімен және пайдаланылатын құрамдас бөлшектермен танысу барысында әр зауыт тек өзі шығаратын дайын өнім аясында ғана жұмыс істейтіні анықталды. Бұл ретте отандық өндірістің барлық құрамдас бөліктері –  импорттық өндіріс өнімі екені жасырын емес. 

«Біз жоғары технологиялы модульдер мен блоктар бар екенін түсінеміз, олар ерекше қарапайым материалдардан жасалса да, өндірісі күрделі болуы мүмкін. Бірақ сонымен қатар, арнайы жабдықты немесе жоғары технологияны қажет етпейтін қарапайым бөлшектер мен заттарға қатысты да қиындықтарға тап болып отырмыз.  Көп жағдайда қаптамалар мен корпустар жақын шетелден әкелінеді, ал шын мәнінде, біздің зауыттардың оларды кез келген материалдан жасап шығара алатын мүмкіндігі бар», - деп нақтылады ол.

Солтамбековтың айтуынша, ТКШ ҚазОрталығы қосымша ТКШ саласы мен энергетика өндірушілерінің өзара іс-қимылы үшін отандық зауыттардың жеке каталогын қалыптастырады.