Қазақстан энергетика саласындағы жобаларға Азия даму банкінен 5,4 млрд доллар инвестиция тартады

Астанада өтіп жатқан «RES-2026» Өңірлік экологиялық саммиті аясында Қазақстанның Энергетика министрі Ерлан Ақкенженов пен Азия даму банкінің бас директоры Евгений Жуковтың кездесуі өтті. Кездесу барысында энергетика секторындағы бірлескен жобалар талқыланды.

Келіссөздердің басты тақырыбы Қазақстан үкіметі мен Азия даму банкі басшылығы арасындағы уағдаластықтардың нәтижесі болды. ҚР Энергетика министрлігінің мәліметінше, бұған дейін 2026-2029 жылдар аралығында жалпы сомасы шамамен $5,4 млрд долларды құрайтын 15 жобаны жүзеге асыруды көздейтін меморандумға қол қойылған.

Басым бағыттардың бірі жылумен жабдықтау жүйелерін жаңғырту болып белгіленді. Кездесуге қатысушылар сондай-ақ энергия тиімділігін арттыруға, шығынды азайтуға және ЖЭО, қазандықтар мен жылу желілерін жаңартуға бағытталған жылумен жабдықтаудың өңірлік схемаларын бірлесіп әзірлеу мүмкіндігін қарастырды.

Декарбонизация және заманауи технологиялық шешімдерді енгізу мәселелеріне ерекше назар аударылды. Мәселен, газ технологияларын, жылу энергиясын жинақтау және желілерді цифрлық басқару жүйелерін қолдану талқыланды. Бұдан басқа, жаңартылатын көздер үлесінің өсуі аясында энергия жүйесінің тұрақтылығын арттыру үшін Smart Grid шешімдері мен энергия жинақтау жүйелерін енгізуді қоса алғанда, электр желілерін дамыту перспективалары айтылды. 

Энергетика министрлігі Азия даму банкімен серіктестік инфрақұрылымдық жобаларды қаржыландыруды, жеке инвестицияларды тартуды, тарифтік саясатты жетілдіруді, мемлекеттік-жеке меншік әріптестік тетіктерін дамытуды және білікті кадрлар даярлауды қоса алғанда, негізгі бағыттар бойынша кеңейтілетінін атап өтті.