Атырау облысында 393 шақырым электр желісі жаңартылады
Атырау облысында тозығы жеткен электр желілерін ауқымды жаңарту басталады. 2026-2027 жылдары өңірде 393 шақырымға жуық электр желісі қайта құрылып, 23 жаңа трансформаторлық пункт орнатылады. Сонымен қатар төрт қосалқы станциядағы ескі трансформаторлар ауыстырылады.
Жұмыстар «Энергетикалық және коммуналдық секторларды жаңғырту» ұлттық жобасы аясында жүзеге асырылады. Жобалар Атырау қаласын, Жылыой, Исатай, Мақат және Қызылқоға аудандарын қамтиды.
Электр желілерінің тозуы 65%-дан асты
Өңірдегі әуе желілерінің, қосалқы станциялар мен трансформаторлардың басым бөлігі 1960–1980 жылдары пайдалануға берілген. Содан бері кейбір нысандарда толық жаңғырту жүргізілмей, жұмыстар негізінен ақауларды жою және ағымдағы жөндеумен шектелген.
Соның салдарынан «Атырау Жарық» ЖШС-нің электр жабдықтарының орташа тозу деңгейі 65,05%-ға жетті. Ескірген желілерде апат қаупі жоғарылап, электр қуатының үзілуі жиілейді. Бұдан бөлек, мұндай инфрақұрылымды күтіп ұстау мен жөндеуге жұмсалатын шығын да жыл сайын арта түседі.
Желілердің тозуын төмендету үшін компания 2026–2027 жылдарға арналған инвестициялық бағдарлама әзірлеген. Бағдарламаға тоғыз ірі жоба енгізілді. Қазіргі уақытта мердігер компания анықталып, жобалау-сметалық құжаттар дайындалып жатыр.
Жоспар бойынша алдағы бес жылда электр желілерінің тозу деңгейін 65,05%-дан 40%-ға дейін төмендету көзделген.
Қай аумақтарда желілер жаңартылады?
Мәселен, Жылыой ауданында Құлсары – Майқұмген бағытындағы 65 шақырым жоғары кернеулі желі және оған жалғасатын 6 шақырым желі жаңартылады. Бұл желі Құлсары қаласы мен маңындағы елді мекендерді электрмен қамтуда маңызды рөл атқарады.
Исатай ауданында Тайман – Октябрьская бағытындағы 65 шақырым әуе желісі қайта құрылады. Ескірген бағаналар мен сымдарды ауыстыру желінің өткізу мүмкіндігін арттырып, электр қуатының жиі үзілуін азайтуға тиіс.
Атырау қаласында «Балықшы» бағытындағы 8,2 шақырым және «Шмунк» бағытындағы 2,5 шақырым электр желісі жаңартылады. Сондай-ақ «Пичугин», «Құрманғазы», «Шмунк» және «Мелькомбинат» қосалқы станцияларындағы трансформаторлар ауыстырылады.
Мақат ауданында 40 шақырым магистральдық желі және елді мекендер ішіндегі 83 шақырымнан астам электр желісі жаңғыртылады. Бұдан бөлек, аудан аумағында алты жаңа трансформаторлық пункт салу жоспарланған.
Қызылқоға ауданында 123,2 шақырым электр желісі толық ауыстырылады. Сонымен бірге 17 жаңа трансформаторлық пункт орнатылады. Бұл – бағдарламадағы желі ұзындығы бойынша ең ауқымды жобалардың бірі.
Апаттар азайып, электрмен қамту тұрақтылығы артады
Жаңғырту барысында ескі сымдар, электр бағаналары, трансформаторлар және басқа да жабдықтар кезең-кезеңімен ауыстырылады. Жаңа желілер заманауи техникалық талаптарға сай салынып, электр қуатын тасымалдау кезіндегі шығынды азайтуға мүмкіндік береді.
Жобалар аяқталғаннан кейін Атырау қаласы мен облыс аудандарындағы тұрғындарды, әлеуметтік нысандарды және өндірістік кәсіпорындарды электрмен қамту сенімділігі артады. Сонымен қатар желілердегі апат саны мен жоспардан тыс өшулерді азайту көзделіп отыр.
«Өңірдегі бірқатар электр желісі ондаған жылдан бері пайдаланылып келеді. Ұлттық жоба аясында ескірген сымдар, желілер мен трансформаторлар кезең-кезеңімен ауыстырылады. Бұл апаттар санын азайтып, тұрғындарға, кәсіпорындар мен әлеуметтік нысандарға жеткізілетін электр қуатының сапасын арттыруға мүмкіндік береді. Жобаларда қолданылатын материалдардың басым бөлігі Қазақстанда өндіріледі. Барлық жұмысты сапалы әрі бекітілген кестеге сай аяқтау міндеті қойылды», – деді «Атырау Жарық» ЖШС директоры Мейірбек Губашев.