Атырауда ЭКСЖ ұлттық жобасының негізгі бағыттары түсіндірілді

Атырау қаласындағы көшпелі кеңеске әкімдік, табиғи монополиялар субъектілерінің, құрылыс және жобалау компанияларының, бизнес-қауымдастықтардың өкілдері және салалық сарапшылар қатысты.

Жобалық кеңсе мүшелері инженерлік инфрақұрылымды жаңарту, қаржыландыру, отандық өндірушілерді қолдау, коммуналдық қызметтердің сапасын арттыру үшін цифрландыру тетіктері туралы айтып берді.

Семинарда Ұлттық экономика министрлігі Табиғи монополияларды реттеу комитетінің өкілі Арман Мәлік, өнеркәсіп және құрылыс министрлігінің өкілі, «Бәйтерек «ҰБХ» АҚ-ның және «ТКШ ҚазОрталығы» АҚ-ның басшылығы сөз сөйледі.

2025-2029 жылдары Атырау облысы бойынша ұлттық жобаға екі ірі компания қатысады: «Атырау Жарық» ЖШС және «Атырау жылу желілері» ЖШС.

Алдын ала бағалау бойынша жобаларды іске асыру Атырау облысында Инфрақұрылым тозуының орташа деңгейін 5%-ға қысқартуға мүмкіндік береді.

2026 жылы облыстың энергетикалық және коммуналдық инфрақұрылымын жаңғыртуға инвестициялар көлемі 34,5 млрд теңгені құрайды.